【睇港女面色做人同做狗都分別？男朋友內心大控訴】
有啲說話男人真係唔夠膽講出口，因為一講女朋友有好大機會會黑面，然後發脾氣問：「你係咪唔愛我喇？嗚嗚嗚....」其實本身只係想好好地傾下大家有咩問題，結果就變左有問題嗰個係自己，所以依家比大家睇下連登既巴打們有咩內心話唔敢講啦。
1. 前一日做野好攰仍然想陪女朋友行下街，但係份工搞到自己冇曬精力，所以先搞到唔想出聲又冇乜表情，唔係有咩不滿。點知女朋友以為自己嬲，係咁解釋都唔信，話我講大話。然後佢又嬲，最後要我氹返佢。有時仲離譜，我嬲佢先，佢又嬲返我，最終咪又係要我調轉頭氹返佢，唉。
2. 做緊份工好多應酬，每次出去女朋友都覺得我係去溝女，事實係女都冇件比我昅，幫老闆斟茶遞水就有我份。雖然返到屋企盡量抽時間陪女朋友，等佢訓左先做自己野，但佢根本唔明我有幾辛苦，我呀只係想佢講「係咪好辛苦呀」咁之嘛。
3. 女朋友成日話我同朋友玩得好開心，不過其實一個正常人除左感情生活，仲要有正常社交圈子先健康。而男人亦唔會好似女人咁要乜都呻先得，我地會透過玩黎減壓(當然唔係玩女)。明明我隔幾日就搵佢一次，除左返工最多就係搵佢，其次先係陪朋友或者屋企人。
4. 想同女朋友傾下唔開心既野反而比佢笑，同佢講攰係想佢安慰我，因為我信任佢，但女朋友冇企喺我立場去睇就屌我。相反佢唔開心我奉旨要做小丑，送野埋單我做曬。
5. 次次都要我送佢返屋企，其實唔係我唔想送，而係太遠呀！平時玩完已經11 12點要趕尾班車，送完佢返去我自己又要搭的士先得，double左既時間同勁貴既車錢點搞？點解佢唔可以就下我喺中間點就分別呢。
有啲男人野我覺得你地真係未必知，睇完可以知多啲都不失為一件好事，唔好諗到對方一定唔中意自己先控訴咁灰。計我話，就算女朋友唔了解自己都好，咁多位男朋友大膽講出黎總好過收埋收埋！起碼比對方機會改過嘛。
Search